KALIBO, Aklan—Umarangkada eon ko Lunes nga adlaw, Setyembre 6, 2021 ro pagbalik it voter registration sa Aklan.
Suno kay Crispin Raymund Gerardo, tagapaghambae it Commission on Elections ukon Comelec-Aklan nga raya hay matapos nga pasugtan ro nasambit nga aktibidad sa mga lugar nga una sa idaeum it Modified Enhanced Community Quarantine (MECQ), kapareho it Aklan.
Apang nagaeaum imaw nga maga-dere-deretso eon ro mas ginpanaba makaron nga quarantine classification sa probinsiya nga general community quarantine ukon GCQ.
Ginkalipay man nanda ro pagbuhos it mga gustong magpa-rehistro.
Mas pa sigon nga ginpaeawig makaron ro voter registration nga halin alas 8 it agahon hasta alas-7 it gabi-i umpisa Lunes hasta Biyernes.
Kada Sabado ag holiday suno kana hay alas 8 it agahon hasta alas 5 it hapon.
Setyembre 30 ro deadline it pagparehistro rason nga gina engganyo nana ro tanan nga asikasuhon raya sa mas temprano.
Owa sigon it extension it voter registration pagkatapos it Sept. 30.
Kinahangean nga magdaea sa opisina it application form nga pwedeng ma-download online ag valid government-issued ID kun sa siin nakabutang ro inyong address.
Kasunod kara ro pagpatigayon it biometrics.
