KALIBO, Aklan – Owa it “big deal” sa kapulisan ro gintagsok nga bandera it China sa front beach ag sangka pampublikong eskwelahan sa isla it Boracay.
Suno sa Malay Police Station, owa it anuman nga laye ukon regulasyon nga nagabawae sa mga dumueong nga turista nga mag-display it andang mga bandera.
Ginpahayag ni P/Major Jess Baylon, dating hepe it Malay PNP nga posibleng nakatau it negatibong impresyon sa ibang residente ro hitabu, apang indi nanda pwedeng arestuhon ro nagahimo kara.
Kaeabanan suno kana nga normal eamang sa mga turista nga nagabutang it andang bandera sa lugar nga andang gina-agtunan agud nga magiyahan ukon “tanda” it andang assemble area it iba pa nanda nga kaibahan sa tour.
Ginpahayag dugang nga owa gid nanda natumod ukon nakilaea ro turista nga nagbutang it China flag sa front beach ag Balabag Elementary School sa Boracay nga nauna eon nga nag-viral ro mga litrato nga nagkalhit sa social media site nga nag-angkon it nagkaeain-eain nga reaksyon sa mga residente ag iba pang mga turista.
Nasayuran nga ro China ro nagapanguna sa listahan it mga dumueuong nga turista nga nagbakasyon sa isla makaron nga 2019 base sa record it Malay Municipal Tourism Office.
