KALIBO, Aklan—Ro pagkaeakot sa natabu nga hacking incident sa Brgy. Calizo, Balete ko nagtaliwan nga Oktubre 7 ro sambilog sa mga ginatan-aw nga motibo sa pagpatay sa sangka eaeaki, agahon it Miyerkules sa Brgy. Libas, Banga.
Dead on the spot ro biktimang si Marte Dalida it Brgy. Venturanza, Banga matapos nga ginbaril it makapilang beses it motorcycle riding suspect sa nasambit nga lugar.
Suno kay P/Capt Benny Jones Mendoza, hepe it Banga Municipal Police Station nga ro insidente sa brutal nga pagpatay kay Rex Quindong ro nakikita nanda nga pinaka-kongkretong motibo sa pagpatay kay Dalida apang ginatumod pa nanda ro iba pang posibleng anggulo.
Nakikipag-istorya eon man sigon ro mga otoridad sa pamilya it biktima, kamana man ro pag-usisa sa anang cellphone sa mga ulihi kara nga naka-istorya.
Gindugang pa ni P/Capt. Mendoza nga maskin may mga na-review nga CCTV angot sa krimen, owa gihapon it identity ro mga suspek bangud nga nakasuksok ro mga raya it helmet ag face mask.
Na-capture pa sa CCTV nga samtang nagapaeagiw ro mga suspek hay gin-uba nanda ro andang suksok nga jacket.
Sa makaron hay padayun ro andang pag-review sa iba pang CCTV footage sa lugar ag pakikipag-istorya sa mga residente nga maeapit sa lugar.
Sa paunang imbestigasyon, nagatuhaw nga 6 nga tama it bala sa nagkaeain-eain nga parte it eawas ro naangkon it biktima nga naging rason it anang hinali nga kamatayon.
Nagapati ro mga otoridad nga nakipag-istorya pa si Dalida sa mga suspek antes nga ginbaril bangud nga naka side stand ro anang motorsiklo sa kilid it karsada.
Madumduman nga napahilway si Dalida sa kustodiya it Balete Municipal Police Station bangud sa reglamentary period ag gin-aku it anang bayaw nga si Edsel Quindong nga imaw eamang ro nagpangalima sa pagpatay sa anang kaugalingon nga tiyo.
