KALIBO, Aklan — Ginakabig it Police Regional Office (PRO-6) nga isolated case ro pagbaril-patay sa beteranong journalist nga si Juan “Johnny” Dayang.
Suno kay PRO-6 spokesperson Lt. Col. Arnel Solis nga owa it natabu nga kaparehong insidente kara sa bilog nga Western Visayas.
Nagapadayun pa suno kana ro maid-id nga imbestigasyon it ginbilog nga special investigation task group sa pagbaril sa 89 anyos nga mamamahayag kun sa siin owa pa it natumod nga motibo sa krimen.
Nagaeaum man ro PRO 6 nga ro insidente hay indi makaapekto sa peace and order it eleksyon bangud sa nakaplastar nga mga pro-active measures.
Madumduman nga si Dayang hay ginbaril it owa pa nakilaea nga gunman samtang nagatan-aw it telebisyon sa sueod it anang baeay.
Ginakabig ro insidente nga sangka serious concern, partikular sa kaeowasan it mga mamamahayag ag media community.
