KALIBO, Aklan—Naboe-an it CCTV camera ro motorcycle riding suspects nga responsabli sa pagbaril sa 23-anyos nga empleyado it sangka delivery express, kun sa siin naagaw ro anang daea nga plastic bag nga may sueod nga ginaboeobanta nga P500,000 cash sa guwa it andang opisina sa Barangay Dumga, Makato bandang alas-8:20, agahon it Sabado, Abril 27.
Apang ginasugid nga magsobra P150,000 eamang ro natigayon nga mabo-oe it mga owa pa nakilaea nga mga suspek matapos nga magisi ro ginhabnit kara nga plastic bag ag nagkalhit sa karsada ro iba pang kwarta nga may nagkaeain-eain nga denomination.
Nakataeana kunta nga iga-deposito ro nasambit nga kwarta it biktimang si Jan Andrei Bolido, residente it Brgy. Tondog, Tangalan ag nagatrabaho bilang quality assurance it J&T Express sa sangka money transfer kat matabu ro insidente.
Ginatumod pa hasta sa makaron it mga awtoridad ro pagkatawo it nagpaeagiw nga mga suspek nga armado it owa pa nasayuran nga kalibre it baril.
Nagatuhaw sa imbestigasyon nga samtang nagapasakay ro biktima sa andang delivery truck agud kunta nga magdeposito it kwarta kat gulping ginpaeapitan it sambilog sa mga suspek nga naka-full faced helmet ag ginbaril it maeapitan nga tinamaan sa anang kilid it eawas ag dayun nga ginhabnit ro anang daea nga plastic.
Matapos ro insidente hay nagdaeagan ro suspek paagto sa nagahueat nga get-away vehicle nga sangka itom nga motorsiklo ag nagpaeagiw paagto sa direksyon it Kalibo.
Nadaea pa ro biktima sa St. Gabriel Hospital apang gindeklara nga dead on arrival it doktor.
Samtang, ginpaidaeum sa autopsy ro bangkay it biktima kun sa siin narekober ro bala sa anang eawas.
Padayun pa ro imbestigasyon it pulisya sa insidente.
Nagapaninggitan man ro pamilya it biktima nga kabay nga mataw-an it hustisya ro kamatayon ni jan Andrei sa mas madasig nga tiempo.
