KALIBO, Aklan—Grabe ro kasubo ag kasakit nga nabatyagan it pamilya Cuesta tuga it pagkamatay it andang himata nga si Juluis Cuesta, 31-anyos ag residente it Barangay Tambak, New Washington sa owa ginaeauman nga kahigayunan.
Ro biktima nga sangka kolektor it motorcycle dealer hay ginbaril sa anang ueo samtang sakay it anang motorsiklo it riding in tandem ag nagapa-agto eon kunta sa anang trabaho sa banwa it Kalibo.
Imaw hay gin-ipingan it mga suspek sa national highway nga sakop it Brgy. Caano, Kalibo kaina it agahon ag pagkatapos hay ginbaril.
Suno kay Mrs. Marlyn Cuesta Villaruel, tiya it biktima nga nagapati sanda nga may kaangtanan sa trabaho ro pagbaril sa anang gumankon bangud nga antes sigon nga natabu ro krimen hay may gin embargo raya nga motorsiklo halin sa andang kliyente nga owa nakabayad.
Kadungan kara, nagpanawagan sanda it hustisya sa krimen nga nag-utas gid sa kabuhi it andang gumankon.
Nagapati ro pamilya nga may naghingabot sa kabuhi ni Julius bangud nga owa raya it kaaway sa andang lugar ag kilaea raya nga mabuot nga klase it tawo.
Sa kamatuoran sigon hay raya ro nagtinguha agud nga mapatapos ro anang kaugalingon sa pag-eskwela.
Nauna eon nga ginpasiguro it pamunuan it kalibo municipal police station nga taw-an it hustisya ro biktima.
Madumduman nga base sa pahayag it pamilya, gina-angot nanda ro motibo sa pagpatay kay julius sa anang trabaho bilang kolektor.
Nagaduda man sanda nga binayaran ro riding in tandem nga pumatay sa biktima.
Sa pihak nga parte, plano pa kunta ni Julius nga ipa-repair ro andang kusina sa anang pag-sweldo sa petsa 15 it makaron nga buean bilang sangka breawinner.
Imaw hay kamanghuran sa daywang magmaeangud.
