NEW WASHINGTON, Aklan — Umani it nagkaeain-eain nga reaksyon halin sa mga lokal nga opisyal ag apektadong sektor ro pagbasura sa ginaproponer nga Lagatik River Conservation and Preservation Ordinance sa nasambit nga banwa.
Tuyo it tikang nga ideklara ro portion it Lagatik River halin sa Barangay Tambak hasta sa Barangay Dumaguit bilang sangka strict environmental conservation zone.
Kaibahan sa mga aktibidad nga posibleng igabawae ro shipyard, dry dock, ag pagkumpuni it mga baroto sa kilid it suba.
Angot kara, ginpahayag ni Engr. Jonathan Salvador, tag-ana it Metallica Shipyard nga patas ro naging desisyon it Sangguniang Bayan sa pagbasura it nasambit nga proposed ordinance.
Pilang negosyante ag opisyal it barangay ro nagpahayag it pagkontra sa proposisyon bangud sa posibleng epekto kara sa pangabuhian ag trabaho it mga residente.
Ginpamilit man it pilang kritiko nga dapat unahon it lokal nga gobyerno ro pagsabat sa problema sa basura ag solid waste management sa banwa.
Samtang, nagapabilin nga importante ro pag-amlig sa Lagatik River, rason nga kinahangean sigon nga timbangon it mga natungdan ro proteksiyon sa palibot ag ro pangabuhian it mga apektadong sektor.
