KALIBO, Aklan—Nagpagguwa it panibag-ong advisory si Aklan Governor Florencio Miraflores angot sa temporaryong pagsuspendi sa pagbaton it mga naga-uli nga Locally Stranded Individuals ukon LSIs sa probinsya it Aklan ag ro pag-agi it mga LSI sa tanan nga kabanwahanan nga sakop it Western Visayas.
Suno kay League of the Municipalities of the Philippines ukon LMP-Aklan Chapter President ag Ibajay Mayor Joen Miraflores, nga raya hay kasunod sa ginpagguwa nga guidelines it National Inter-Agency Task Force (IATF) ag ginrekomenda mismo ni National Chief Implementer Secretary Carlito Galvez Jr. kung sa siin temporaryong ginsuspendi ro pagpauli it mga LSI sa bilog nga Region VI, Iligan Province ag Lanao del Norte.
Suno sa alkalde, mismong Regional Inter-Agency Task Force it Western Visayas sigon ro nag-request kara sa national IATF.
Maskin si Governor Miraflores sigon hay nakibot sa rayang gulpyadang desisyon.
Nagpaabot man it pagkasubo ag pag-intindi si Mayor Miraflores sa tanan nga apektadong LSI eabi eon sa mga nakapa-book it andang ticket ag nakataeana eon kunta nga mag-uli sa probinsya.
Aminado man raya nga punuan eon ro mga quarantine facility sa bilog nga probinsya it Aklan.
Samtang, ginpasiguro man kara nga bukon it permanente ro pagsuspendi sa pagpauli it mga LSI.
