KALIBO, Aklan—Nagapati si Aklan 1st District Sangguniang Panlalawigan Member Atty. Harry Sucgang nga makaangkon it manami nga resulta ro pagbaton ni Vice President Leni Robredo sa tanyag ni Pangueong Rodrigo Duterte nga maging co-chair it Inter-Agency Committee on Anti-Illegal Drugs (ICAD).
Suno kana nga mataw-an kara it kahigayunan ro bise presidente nga makapangayo it bulig sa ibang nasyon agud nga masolusyunan ro problema sa droga sa Pilipinas.
Bilang frontline suno kana sa pagsukoe sa illegal drugs hay makita ni Robredo ro mga nagakatabu sa ground ag maka-usoy raya it nagakaigo nga solusyon.
Engkaso nga maging madinaeag-on hay makatau man raya it puntos sa administrasyong Duterte.
Dugang pa nga posible man raya nga magtueod kana agud nga mapili nga kandidato sa pagkapangueo sa masunod nga eleksyon.
Imposible man sigon nga mabasuean imaw engkaso nga pumalpak ro anang trabaho bangud sa una pa eang hay nasayuran it administrasyon nga bukon imaw it experiensiyado sa nasambit nga patag.
Sa anang pagbuyot bilang drug czar, dikara sigon masayuran kon seryoso ro tanyag kana pinaagi sa suporta it nagkaeain-eain nga ahensiya nga kaeakip sa ICAD.
