Nagpaguwa it mando si Aklan Governor Joen Miraflores angot sa pagbawae nga makasueod ro buhi nga baboy, karne ukon produkto halin sa lugar nga may kaso it African Swine Fever ukon ASF.
Ssandig sa executive order number 045 series of 2022 nga pirmado it gobernador, ginmando kara ro hugot nga monitoring ag pagsikyar sa mga boundaries area pasueod sa probinsya it Aklan kon siin gilayon nga pagakumpiskahon ro mga produkto ukon sapat nga magahalin sa natumod nga lugar.
Angot kara, ginpaathag ni Dr. Joseph Lachica it Office of the Provincial Veterinary nga halin pa ko 2019 kat nagtuhaw ro ASF hay uwa naduea ro border quarantine checkpoint sa may bahin it banwa it Buruanga, Nabas, Altavas ag Jetty Port.
Ginlaygayan kara ro mga hog raisers nga magpatuman it biosecurity measures kaparehas sa pagpatigayon it disinfectant, inde magpasueod it tawo sa babuyan nga halin sa lugar nga infected it virus ag maabong iba pa.
Sa raya nga pamaagi suno kana hay malikawan nga makaangkon it virus ro alagang baboy.
Nauna eon nga ginkumpirma ro kauna-unahang kaso it ASF sa Western Visayas nga nailista sa sangka farm sa syudad it Iloilo.
Raya hay base man sa ginpaguwang resulta it Bureau of Animal Industry – Animal Disease Diagnosis and Reference Laboratory sa ginpadaea nga blood samples it mga baboy nga nakabatyag it sintomas it African Swine Fever.
