KALIBO, Aklan — Suportado it local government unit (LGU)-Malay ro plano it Department of Environment and Natural Resources (DENR) nga ibawae sa isla it Boracay ro pagbaligya it mga produktong nagagamit it single-use plastics matapos nga matukiban nga may mabahoe nga kontribusyon sa problema sa basura ro paggamit kara.
Sa kamatuoran hay nagpaguwa it flyers ro Information and Education Campaign it Solid Waste Management it munisipyo angot kara.
Suno sa taeatapan nga raya hay sandig sa naga-eksister nga Municipal Ordinance No. 320 series of 2012, ukon mas kilaea sa tawag nga “An Ordinance Prohibiting the Use of Plastic Bags on Dry Goods, Regulating its Utilization on Wet Goods and Prohibiting the Use of Styrofoam/styrophor in the Municipality of Malay and Prescribing the Penalties Thereof.”
Nasayuran nga ro single-use plastic products hay ginaeakipan it mga toothbrush, sachet it shampoo ag condiments, putos it mga sabon ag iba pa.
Suno sa DENR nga seryoso nanda nga ginakonsidera ro pagbawae sa single use plastic items sa isla agud nga masabat ro naga-grabe nga problema sa basura.
Ro polusyon sa plastic ro padayun nga nagahilo sa dagat ag nagahalit sa marine life .
Ginpahayag dugang nga bangud sa bukon it tama nga pagpilak it basura hay nagabara ro mga plastic sa mga kanae nga nagatuga it pagbaha .
Gina-engganyo man ro mga hotels ag resorts nga maggamit it dispensers para sa mga liquid soap, shampoo ag conditioner.
Samtang, ro mga baraka hay pagahinyuon nga magbaligya it toyo, eanggaw ag mantika sa mga customer nga may daeang sueudlan kapareho it baso, bote ag iba pa.
Madumduman nga ginmandu ro pagpasarado sa isla ko Abril 26 sa sueod it an-um nga buean agud nga taw-an it daean ro paglimpyo ag rehabilitasyon .
Pila sa mga environmental issues nga ginapangatubang it isla hay ro kakueangan it epektibong solid waste management program nga kon sa siin ro isla hay nakakatipon it kapin sa 90 hasta 115 nga tonelada it basura kada adlaw.
