Agud nga magapabilin nga healthy ro inyong eawas ag siguradong ikaw hay makabilog it baby may mga dapat nga tandaan agud nga malikawan ro infertility.
Suno sa pagtuon, mas mayad nga magsuksok it boxer kaysa nga brief ro mga eaeaki agud nga masudlan raya it sangkiri nga hangin.
Ro pagsuksok it hugut nga underwear kapareho it brief hay delikado sa ikamayad nga eawas it mga kaeaeakin-an.
Sa pihak nga parte, mayad nga exercise ro pagbisikleta , apang nasayuran baea ninyo nga raya hay delikado sa kinatawo it mga eaeaki.
Raya hay bangud nga nagaka-igpit si “Jun-Jun” sa pungkuan it bike kon nagabisikleta.
Ginalaygay dugang nga agud nga makabilog it baby, punduhon anay ro paggamit it cellphone.
Base sa pagtuon , ginasugid nga ro radiation nga nagahalin sa cellphone hay nakakaapekto sa kalidad it sperm it eaeaki.
Raya hay may kaangtanan sa DNA fragmentation level ag pagnaba it sperm motility.
Pwedeng bawasan ro screentime kon gusto nga magka-unga.
Mag-eowas kara, dapat man nga likawan ro pagsigarilyo bangud nga ro regular nga paggamit kara hay nagapanaba sa sperm it sangka eaeaki.
Pwede man nga makaangkon it morphological effects ro andang sperm.
Laygay pa it mga eksperto nga bawasan man ro pag inom it aeak bangud nga ro sobrang pag-inom kara hay may negatibong epekto sa sperm count it eaeaki.
Kaibahan kara ro pagnaba it lebel it testosterone ag pagbag-o it gonadotropin.
Nagaisot man ro kabahoe it testes ag naganaba ro ejaculation .
