Naapresiyar gid ni Sangguniang Bayan member Agusto Tolentino ro personal nga pagbisita ni Vice President Sara Carpio Duterte sa Probinsya it Aklan.
Raya hay kasunod it pagtambong it bise presidente sa ginpatigayon nga pagpasidungog sa Aklan’s Ten Outstanding Mentors 2023 sa ABL Sports Complex, Kalibo, Aklan.
Suno kana nga raya hay sambilog man sa pamaagi it bise presidente para mapaabot ro pagpasaeamat sa suporta nga naangkon kara maghalin sa mga Aklanon ko nagtaliwan nga eleksyon.
Naangkon sigon kara ro makabig nga overwhelming votes ko nagtaliwan nga eleksyon maghalin sa bilog nga probinsya it Aklan partikular sa banwa it Kalibo ag Ibajay.
Sa pihak nga parte, nagapati man si Tolentino nga padayon nga magabulig si VP Sara sa mga manugturo ag sa sektor it edukasyon sa bilog nga nasyon eabi eon gid sa probinsya it Aklan.
Madumduman nga sa makaron hay ro bise presidente man ro sekretarya nga nagadumaea sa Department of Education.
