Puspusan eon ro pagpahaum ag pagsapinal it gobyerno probinsyal ag Malay Tourism Office sa ginahimo nga preparasyon sa ginakaeangkagan nga pagbisita it high-end cruise ship nga MS Seabourn Encore sakay ro inde magnaba sa 400 nga European tourist ag 200 ka mga crew nga nakataeana ro andang pag-abot sa Pebero 13.
Suno kay Mr. Nieven Maquirang, executive assistant V it Office of the Governor, raya ro unang cruise ship nga magadungka sa Boracay matapos ro haeos daywang dag-on nga pandemya.
Angot kara, agud nga uwa it magiging aberya sa pagdungka it kauna-unahang cruise ship makaron nga dag-on hay sangka stakeholders orientation ag final meeting ro ginpatigayon nga gintambungan it round committee it gobyerno probinsyal.
Pila sa mga nakaskedyul nga aktibidad it mga magapanaog nga international tourist hay ro pagbisita sa Motag living museum sa mainland Malay; Island hopping ag ro paglibot sa mga tiangge kon sa siin makit-an ag mabakae ro mga nagkaeain-eain nga souvenirs nga kaeabanan hay himo mismo it mga tumandok it Boracay.
Magabuhay ro mga turista sa isla it Boracay sa sueod it waeong oras.
Samtang, ginkumpirma man ni Maquirang nga kabilugang 18 ka mga cruise ships ro nagpakumpirma nga magaabot sa Boracay makaron nga dag-on nga sakay it mga raya ro 500-1000 nga mga turista.
