Kalibo Aklan ———-Naging madinaeag-on ro pagbisita ni DoT Western Visayas regional director (RD), Cristine Mansinares sa Isla it Boracay ko adlaw it Huwebes, Marso 10 kun sa siin gintalakay kara ro pilang ka mga tikang agud mas pang mapabaskog ro turismo sa sambilog sa mga ginakilaea nga baeakasyunan sa bilog nga kalibutan.
Suno kay Malay Municipal Tourism Officer Felix Delos Santos nga naging sentro sa pagbisita ni DoT regional director Mansinares ro pakikipagpueong sa mga national ag international tourism attache nga nagatuyong maka-engganyo pa it mas maabong mga turista.
Ginapahayag nga posibleng sa katapusan it buean it Marso hay maayos eun ro pagkaangkon it mga turista maghalin sa South Korea.
Samtang ginplastar man sigon kara ro mga tikang nga pagahimuon it DoT agud nga maduea ro kabaeaka it mga turista sa nag-eutawan nga mga eumot ko kan-o eamang sa babayon it Boracay.
Naglibot man sigon sanda sa mainland Malay agud nga makit-an ro mga dapat pang himuon agud mapaeapad pa ro turismo sa lugar.
Kasunod pa kara hay ro pagpanumpa it mga bag-ong officers it Boracay Foundation Incorporated.
Nasayuran nga sa makarun hay naga-abot eun sa 3,000 hasta 5,000 ka mga turista ro nagabisita sa Boracay kada adlaw.
Umpisa Marso 1 hasta 13 hay nakalista eun it kabilugang 59,109 ka mga turista kun sa siin kaabuan hay maghalin sa NCR, CALABARZON, Cebu, Central ag Western Visayas.
Samtang, nakarecord man it 498 ka mga foreign tourist nga kaabuan hay maghalin sa US, UK ag Canada.
