Sa pihak nga nagapabilin nga manaba ro mga nailistang mga bag-ong kaso it COVID, kinahangean sigon nga ipabilin gihapon ro pagsuksok it face mask.
May mga panawagan nga indi eon pag-obrahon nga mandatory ro pagsuksok it face mask bangud nga naganami eon ro kahimtangan it nasyon kon ro paeag it COVID ro paga-istoryahan.
Sa tantiya it pilang health experts, dapat nga ipabilin pa hasta sa Disyembre it makaron nga dag-on ro pagsuksok it face mask.
Ro pagbo-oe it face mask ro ginasugid nga ulihing senyales sa eubusan nga pagbalik sa normal it nasyon matapos nga maexperiensiyahan ro pandemya.
May suhestiyon ro pilang sektor nga kun magapabilin sigon nga manaba ro mga nailistang kaso, pwede eon nga maistoryahan nga i-relax eon ro pagsuksok it face mask.
May proposisyon pa nga pwedeng umpisahan raya sa outdoors ag ipatuman sa indoors.
Pwede man raya nga matalakay it masunod nga administrasyon.
Apang kon ro OCTA ro masunod, mas gusto pa nanda nga ipabilin ro mandatory nga pagsuksok it face mask sa matag-od pang tiempo.
Indi dapat nga magpagulpi-gulpi sa raya nga sueundanan eabi pa ag nagapabilin ro paeag it mga nagatuhaw nga subvariant it virus.
Ginhalimbawa kara it OCTA ro natabu nga pag-relax it ibang nasyon kapareho it Estados Unidos sa pagsuksok it face mask.
Ro resulta hay ro uman nga pag angkon it surge sa COVID.
Mabahoe nga bagay ro nahimo it padayun nga pagsuksok it face mask agud nga maskin nga indi man eubusan nga mapugngan hay mahinay ro mailistang pagtaeapnan dugangan pa ro padayun nga pagpabakuna.
Naeampasan eon it nasyon ro pinaka-grabeng hangkat it pandemya.
Naka-antus kita it mabuhay nga tiempo.
Makaron nga sangkiri ukon madali eon lang matapos, tiisan anay naton agud nga owa it pagahinoesuean.
Rason nga ginapadumdum it mga eksperto, bukon pa it tapos ro pandemic, rason nga indi dapat nga maging kumpiyansa.
