KALIBO, Aklan—Naging epektibo eon sigon ro ordinansa nga nagabawae sa mga residente ag mga hotel and resort owners sa isla it Boracay ag bilog nga banwa it Malay nga magbuead it mga underwear, eambong, bed sheet ag iba pang einabhan sa kilid it karsadahon.
Suno kay Malay Mayor Frolibar Bautista nga naging ugali eon it mga tawo nga magbuead sa kilid it karsada agud nga madaling magmaea ro mga raya apang makabig sigon raya nga eye sore ukon bukon it manami sa panan-awan eabi pa ro mga underwear nga nakasab-it.
Gin-abisuhan eon man sigon nanda maskin ro mga nagapanag-iya it hotels ag resorts nga bawaean ro andang mga guests nga magbuead it andang mga tuwalya , swimwear ag iba pa sa mga barandilya sa guwa it andang gina-okupahan nga kwarto.
Tuyo kara nga madisiplina ro mga pumueuyu agud nga mapabilin nga malimpyo ro isla eabi pa makaron nga amat-amat eon nga nagabangon ro turismo tuga it epekto it Covid-19 pandemic.
Sa gin-aprubahan nga ordinansa it sangguniang bayan it malay, pagapapanaugan it multa nga naga-abot sa P2,500 pesos ro maga-eabag kara.
