KALIBO, Aklan—Dapat nga pirmeng maging last option it mag-asawa ro pagbueag kon makaangkon it owa pagka-ilintindihan.
Raya ro ginpahayag ni Sangguniang Panlalawigan member Atty. Harry Sucgang angot sa reklamo it sangka misis sa anang mister nga gina-alegar nga nagapanakit ag nagapangbabaye.
Suno kana nga sa pag angkon it broken family, ro mga inunga ro eubus nga apektado.
Ginlaygay ni Atty. Sucgang sa tagreklamo nga si Eunice Olog nga bilang sangka iwag it panimaeay hay kinahangean nga pirmeng isipon ro kamaeayran it anang mga inunga ag bilog nga pamilya.
Kon naga-alsa balutan suno kana hay indi dapat nga aywan ro andang mga unga eabi eon ro mga maintok ag itugyan sa poder it andang ama ro pag alaga bilang pagbaeos.
Sa parte man ni Jerry Olog, ginpaabot ni Atty. Sucgang nga ro mga ama hay ginatawag nga haligi it baeay bangud nga sanda ro nagaserbing giya, nagatau it proteksyon ag suporta sa andang mga unga ag asawa.
Kon ginasakit suno kana it mister ag gusto eon nga makipagbueag, pwedeng magpasaka it kaso sa korte ro misis para sa child support sandig sa Article 195 it Family Code of the Philippines nga nagahambae nga obligado nga suportahan it ginikanan ro andang mga unga.
Gindugang pa ni Atty. Sucgang nga ro owa pagtau it suporta it ama sa anang mga unga ag pagsakit sa anang asawa hay sangka krimen base sa Republic Act No. 9262, kun sa siin pwedeng makulong ro ama kun mapamatud-an nga owa nagatau it bastanteng suportang pinansyal sa anang mga unga.
