KALIBO, Aklan–Nagakinahangean it padayun ag tingub nga pagbueuligan ro tanan nga sektor agud nga indi maging ma-eayo ro gap it forest cover sa forest land.
Raya ro ginpahayag ni Merlene Aborka it Provincial Environment and Natural Resources Office ukon PENRO-Aklan.
Raya hay kasunod it pahayag ni Environment Secretary Maria Antonia Yulo-Loyzaga nga sa kabilugan nga 15 million nga ektarya it forest lands sa nasyon hay pitong milyon eon lang ro may madamoe nga forest cover.
Bangud kara, ginpahayag ni Aborka nga dapat nga magpatuman it mga nagakaigo nga tikang agud nga mapasaka ro numero it kapin sa 10 million nga ektarya sa idaeum it National Greening Program.
Nauna eon nga ginpahayag it DENR nga nagapangatubang ro kalibutan it tatlong krisis nga ginaeakipan it climate change, biodiversity loss ag polusyon kun sa siin apektado kara ro kaeugtaan, kagueangan ag maskin ro pangisdaan ag aquatic resources.
Tanan sigon raya hay kaibahan sa madasig nga pag-umwad it mga siyudad ag may positibong impact sa ekonomiya it nasyon apang may paeag sa environment ukon palibot.
