KALIBO, Aklan — Ginakabig it Malay Municipal Police Station bilang sangka isolated incident ag uwa nagasaeaming sa pangkabilugang kaayusan sa lugar ro nag-eontad nga pagkastigo sa onga ag gumankon ni Senate President Pro Tempore Jinggoy Estrada sa isla it Boracay.
Sa ginpaguwa nga statement it Malay MPS, nagapabilin nga nagapangunang prayoridad nanda ro kaeowasan it mga turista ag residente.
Ginpasiguro man it mga raya nga andang igapatuman ro mga naga-iral nga laye kontra sa mga naga-eabag kara agud nga padayong magapabilin ro kalinungan ag seguridad sa isla it Boracay ag bilog nga banwa it Malay.
Nauna eon nga ginkumpirma ni Senador Estrada nga ro anang onga ag gumankon hay ginsakit it tatlong eaeaki nga lokal nga mga residente it Boracay, aga-aga it Sabado, Mayo 24, 2025.
Base sa panaysayon it mga biktima, pauli eon halin sa sangka bar ro daywa kat ginsalakay sanda it mga suspek halin sa andang likod.
Suno pa sa senador, uwa it natabo nga komprontasyon sa tunga it mga biktima ag suspek sa sueod it bar, ag makumpirma sigon raya sa CCTV footage nga andang nabueo halin sa natabuan it insidente.
Nakaangkon it lastro ro daywang biktima rason nga gindaea ro mga raya sa ospital sa isla.
Gilayon man nga nagbyahe ro senador sa Boracay kon sa siin madinaeag-on nga naaresto ag napasakaan it kaso ro mga suspek nga nagahimas eon makaron it maeamig nga rehas sa detention facility it Malay Municipal Police Station para sa nagakaigong disposisyon.
