KALIBO, Aklan–Ginakabig nga welcome development it Malay Tourism Office ro pagbuhos it mga turista sa Isla it Boracay ko Semana Santa.
Suno kay Malay Tourism Officer Felix Delos Santos nga ro mataas nga numero it mga turista hay nagapakita eamang it confidence level it publiko nga magguwa agud nga magbakasyon sa pihak it naexperiensiyahan nga pandemya.
Sa pihak kara, kinahangean gihapon suno kana nga maduso ro sustainable tourism.
Pabor man sigon imaw sa pagtaeana it carrying capacity agud nga mabalanse ro ekonomiya ag pag-amlig sa palibot.
Ginpamilit kara nga kon sobra-sobra ro turista hay nagatipon it maabu nga basura ag indi eon masyadong mag-enjoy ro mg bisita bangud sa overcrowded ro lugar.
Ko 2018 hay temporaryong ginsarado ro isla sa sueod it 6 nga buean agud nga taw-an it daean ro paglimpyo ag rehabilitasyon.
Madumduman nga ko Semana Santa, umabot sa haeos 22,000 ro numero it turista sa Boracay nga eumampas sa gintaeana nga kapasidad nga 19,000.
Ko sabado de Gloria suno kana hay insigidang nagpatigayon it clean up drive ro nagkaeain-eain nga asosasyon ag grupo sa isla kamana man nga owa it nailistang anuman nga krimen base sa report it PNP.
Ginpasiguro man nanda nga mapabilin ro pag-obserba sa minimum public health standards kontra sa COVID-19 sa isla.
