KALIBO, Aklan—Dere-deretso sa gihapon ro pagbuhos it mga turista sa isla it Boracay makaron nga tiempo it kapaskwahan.
Suno kay Felix delos Santos it Malay Tourism office, ginpahauman eon it mga hotel ag restaurant owner sa isla ro pag abu it mga turista eabi pa ag raya sigon ro tiempo nga ginaeauman nanda amat amat eon nga makabawi halin sa pagkalugi bangud sa pandemya.
Samtang, naga-abot eon sa 73,480 ro numero it domestic tourist arrivals sa boracay umpisa disyembre 1 hasta 23, 2021.
Ro nasambit suno kana nga numero ro pinakamataas nanda nga nailistang tourist arrivals makaron nga may pandemya bangud nga ko nobyembre hay naka-abot eamang sanda sa masobra sa 67,000.
Naga-average sigon sanda it 4,000 hasta 5,000 nga daily tourist arrivals ag may kahigayunan pa nga naka-abot sanda it masobra sa 6,000.
Dugang pa ni Delos Santos nga ginaeauman nga mas pang madugangan ro mga bakasyunista sa adlaw mismo it paskwa hasta sa selebrasyon it bag-ong dag-on.
Kaeabanan sa mga turista hay naghalin sa national capital region ukon NCR plus ag Eestern Visayas.
Apektado man ro mga turista halin sa cebu bangud sa epekto it bagyong Odette.
Samtang, padayun man suno kana ro mga ginapatigayon nga mga events partikular ro ginahiwat nga mga team building it pilang mga LGUs ag iba pang pribadong kompaniya.
Angot kara, nagapabilin man nga naka alerto ro mga kapulisan, municipal auxilliay police , mga tanod ag iba pa agud nga mabantayan ro peace and order ag pagpatuman it husto ro health and safety protocol.
Ginpadumdum man it malay tourism office nga dapat nga fully vaccinated eamang ro pagabatunon nga makasueod sa isla ukon may RT-PCR test negative result kun bukon pa it bakunado ukon naka first dose pa eamang it COVID-19 vaccine.
