Kalibo Aklan —–Ginkumpirma ni Malay Mayor Frolibar Bautista nga indi magapundo ro pagbukas it Boracay nga gin-umpisahan makaron nga adlaw, Hunyo 16, para sa mga turistang magahalin sa Western Visayas.
Sa pag-atubang ni Mayor Bautista sa media, ginpahayag kara nga indi magiging sab-eag sa Boracay soft reopening ro pag-positibo it sangka 26 anyos nga babayeng empleyado it Bureau of Fire Protection (BFP)-Iloilo nga ginasugid nga nag-agto sa Isla ko biyernes nga adlaw , Hunyo 12 ag nag-uli ko domingo, Hunyo 14, bandang ala-1:00 it hapon kaibahan ro iba pang mga katrabaho sa pagpanguna ni BFP Regional Director Sr. Supt. Roy Agoto.
Raya hay kadungan sa pagbisita ni DILG Secretary Eduardo Año ag iba pang miyembro it Boracay Inter Agency Task Force.
Gina-imbestigahan man nanda kon nag-party sa sangka hotel ro andang grupo.
Samtang, nagpaandam si Mayor Bautista nga magapanabat sa laye engkaso nga mapamatud-an nga nag-eabag ro mga raya sa Implementing Rules and Regulations it Republic Act No. 11469 ukon mas kilaea sa tawag nga “Bayanihan to Heal As One Act.
Gindugang pa it alkalde nga nagapadayun pa ro andang contact tracing sa mga nakasalamuha it nasambit nga empleyado it BFP.
Nasayuran nga ro COVID 19 positive hay naka-quarantine sa sangka hotel sa Iloilo matapos nga nag-abot halin sa Cebu City ag ginboe-an it swab test ko Hunyo 6.
Apang nagguwa raya sa quarantine facility ko Hunyo 9 ag nagsunod sa grupo nga nag-agto sa Boracay maskin nga owa pa nakaguwa ro resulta it anang test.
Ko domingo, Hunyo 14 hay nag-positibo raya base sa resultang ginpaguwa it Western Visayas Medical Center, sub-national laboratory it Department of Health (DOH) Region 6.
Uman nga ginbalik sa quarantine facility ro pasyente samtang ginpaidaeum sa tatlong adlaw nga lockdown ro andang opisina sa Iloilo ag naka quarantine man ro anang mga nakaibahan ag ginpaidaeum eon sa rapid test .
Kaibahan sa mga raya ro iba pang mga empleyado it BFP-Aklan.
