KALIBO, Aklan — Naging maayos ro pagbalik eskwela it kapin sa 900,000 nga mga estudyante it elementary ag high school sa andang natungdan nga mga pampublikong eskwelahan sa bilog nga Western Visayas suno sa pamunuan it Department of Education (DepEd) Region 6.
Suno kay Hernani Escullar Jr., tagapaghambae it DepEd Region 6 nga maskin nga may pilang mga sangkiri nga problema nga na-encounter hay makabig nga naging smooth sailing ro naging pagbukas it klase sa 2,836 nga mga pampublikong eskwelahan sa rehiyon.
Angot kara, nagpasaeamat man ro DepEd sa nagkaeain-eain nga ahensya nga nagbulig agud nga maging matawhay ag maayos ro 2025-2026 school opening nga ginaeakipan it pagpakalhit it mga pulis sa mga eskwelahan, kamana man ro pagbulig it mga barangay tanod ag iba pang force multipliers partikular sa pagmandu it maayos nga daeagan it trapiko.
Gindugang pa ni Escullar nga gintaw-an it leeway ro mga private schools sa pagtaeana it school opening basta nga makasunod sa number of school days nga required it DepEd.
Padayun man sigon ro andang pagtipon it datos halin sa waeo nga mga division offices sa Western Visayas angot sa numero it mga enrollees bangud nga may mga estudyante pa nga nagahingabot pa nga magpa-enroll.
Nasayuran nga ko nagtaliwan nga dag-on hay nakalista sanda it kapin sa 995,000 nga mga enrollees.
