Kalibo Aklan ——Naging madinaeag-on ro pagbukas it school year 2020-2021 kahapon nga adlaw it lunes sa mga pampubliko ag pilang pribadong eskwelahan sa probinsiya it Aklan.
Raya ro ginpahayag ni Dr. Miguel Mac Aposin, Schools Division Superintendent it Department of Education ukon DepEd-Aklan.
Suno kay Dr. Aposin nga kapareho it mga learners nga excited eon kunta nga magbalik sa eskwelahan hay nahidlaw man ro mga manugturo sa andang mga estudyante .
Apang bangud sa coronavirus disease 2019 ukon COVID-19 pandemic hay mabahoe nga hangkat ag adjustment ro ginapangatubang it mga learners, ginikanan ag mga manugturo bangud sa bag-ong sistema it pagtinuer-an.
Gindugang pa ni Dr. Aposin nga padayun pa ro andang pagtipon it feedbacks ag observation sa presenteng school year, kun sa siin indi sigon malikawan nga makaangkon it aberya.
Ginaeauman eon sigon it DepEd ro mga problema ag isyu nga magatuhaw sa pagpatuman it blended ag distance learning.
Bangud nga ro pagtinuer-an hay sa sueod it baeay ag bukon it sa classroom , panigurado suno kana nga mas pang pagapabaskugon nanda ro regular monitoring.
Angot kara, ginapangayo nana ro suporta ag kooperasyon it mga ginikanan sa mga manugturo.
Ginpasaeamatan man ni Dr. Aposin ro bulig nga gintau kanda it mga Local Government Units , Barangay Council, kapulisan ag iba pang natungdan nga ahensiya it gobyerno nga naging kabulig nanda sa unang adlaw it pagbukas it klase .
