KALIBO, Aklan—Ginpaabot it Numancia Municipal Police Station nga maga-agi sa tamang proseso ro pagbuyot sa kaso it 16 anyos nga binatilyo nga nakabaril sa anang kaparehong estudyante sa sueod it campus it Numancia Integrated School, agahon it Martes, Oktubre 1 sa Brgy. Poblacion sa nasambit nga banwa .
Suno kay P/Lt. Riza Padilla, deputy chief of police it Numancia MPS nga ginahueat pa nanda ro pinal nga desisyon it pamilya it 19-anyos nga biktima .
Ro Department of Social Welfare and Development ukon DSWD-Aklan ro magatumod suno kana kon ro nasambit nga mga children in conflict with the law ukon CICL hay may discernment ukon naeubtan ro saea nga anang nahimo .
Ginpaidaeum sigon it DSWD kahapon ro gin-imbitahan nanda nga ap-at nga mga pamatan-on kaibahan ro nagbaril sa assessment on discernment kaibahan ro natungdan nga mga ginikanan kun sa siin ginahueat nanda ro resulta it evaluation .
Engkaso nga mapamatud-an sigon nga naeubtan it CICL ro nahimo nga saea ag raya hay may penalidad nga 12 anyos nga pagkakulong, pwedeng ipasaka ro kaso sa korte.
Kon manaba sa an-um nga dag-on ro penalidad nga pagkakulong, pwedeng ipa-pagi ro menor de edad sa proseso it diversion ukon counselling .
Sa pihak nga parte, ginkumpirma ni Lt. Padilla nga naging madinaeag-on ro operasyon it biktima, apang padayun raya nga gina-obserbahan sa intensive care unit it Aklan provincial hospital .
