KALIBO, Aklan—Posibleng hasta eon lang sa katapusan it buean it Marso ro pagbyahe it mga tricycle sa isla it Boracay.
Suno kay Malay Acting Mayor Abram Sualog “tentative” pa eamang sigon raya samtang gina-hueat pa nanda ma-facilitate ro pagdonar it Department of Energy it mga E-trike kamana man ro pag-amyenda it ordinansa sa specification partikular sa seating capacity kara.
Apisar nga pumasa eon sigon ro E-trike it DOE sa kabahoe ag kaeapad kara hay lima eamang ro pwedeng isakay kara mag-eowas sa driver kontraryo sa 7-9 nga seating capacity sa ordinansa.
Dugang pa ni Sualog nga na-delay ro implementasyon it E-trike Program it banwang Malay bangod gintaw-an anay nanda it chansa ro pilang franchise holder nga owa pa maka-avail it E-trike.
Ro 180 units nga donasyon maghalin sa DOE hay igapanagtag sa 250 nga franchise holder nga owa pa it unit t E-trike pinaagi it “raffle”.
Bangod sa non-transferable ro franchise, kung maswertihang mabunutan hay maadto raya sa nakapangaean ag bukon it sa nakabakae it prangkisa.
Samtang, kung madayun ro pag phase-out ng tricycle sa gintaeanang petsa, maga-angkon it Deployment Plan ro Sangguniang Bayan it Malay ag DOE sa operasyon ukon fleet management it mga units.
