Uwa it nagkontra sa plenaryo sa ginpasa nga resolusyon sa ginpatigayon nga session it Sangguniang Panlalawigan angot sa pagdeklara bilang persona non grata sa mga kongresista nga proponent sa uman nga pagbuhi sa hagna nga pagkriar it Boracay Island Development Authority ukon BIDA bill.
Sa nasambit nga resolusyon, ginpangaeanan sanday Luis Reymund F. Villafuerte, Congressman it 2nd District it Camarines Sur; Cong. Miguel Villafuerte, Congressman it 5th District it Camarines Sur; Tsuyoshi Anthony G. Horibata, Congressman it 1st District it Camarines Sur ag Nicolas C. Enciso VIII, Congressman Representing Bicol Saro Party List bilang persona non grata sa probinsya it Aklan partikular sa isla it Boracay.
Raya nga resolusyon hay bilang pagpakita it sentimyento it mga opisyales it probinsya sa pag-eapas sa andang kinamatarong ag kawad-an it respeto sa Aklan LGU’s.
Samtang sa pihak nga parte, nagpaguwa it pahayag si Aklan second district Cong. Teodorico Haresco nga opisyal eon nga ginwidraw ko Agosto 3 it nasambit nga mga kongresista ro hagna nga HB 1085 ukon ro pagkriar it Boracay Island Development Authority Act.
Ro nasambit nga withdrawal hay nabaton it House Committee on Rules and House Committee on Government Enterprises and Privatization, adlaw it Lunes, August 8.
