KALIBO,Aklan–Nagapadayon ro ginahimo nga pagdevelop sa port nga makit-an sa Brgy. Pook, Kalibo.
Suno kay Punong Barangay Lude Pinos nga inde eon mawad-an it tawo sa nasambit nga lugar halin sa agahon hasta it hapon.
Maabo sigon ro nagadayo maghalin sa mga kaeapit nga banwa bangud sa manami nga taean-awon sa baybayon kon hapon kamana man tama eang ro lugar para pamasyaran it mga magpamilya.
Apang, sambilog sigon sa andang ginaproblemahan hay may mga tawo gid nga inde kaantiguhan magpilak sa eksaktong basurahan it andang basura maskin nga may mga ginbutang man nga basurahan sa lugar.
Sa makaron suno kana hay sigidas ro pagmonitor ag pagbantay it barangay council kabulig ro mga tanod sa lugar agud nga masikyar ro kaeowasan it mga bisita ag iba pang nagadayo sa nasambit nga lugar.
