Kabilugan nga naging matawhay ro flow it tawo sa Medalla Milagrosa ag Old Roman Catholic Cemetery hasta it gabie sa pagdumdom sa pyesta minatay.
Raya hay matapos nga uwa it nailistang untoward incident sa bilog nga sang adlaw matapos nga ginpasugtan ro mga tawo nga magsueod sa sementeryo agud nga magbisita sa andang mga pinalangga sa kabuhi nga nagtaealiwan.
Suno sa caretaker nga si Eulysis Cipriano, makit-an nga naging responsable ro kada isaea sa pagsunod sa ginpatuman nga sueondanan para sa kaayusan ag kalinungan sa pagdumdom sa mga minatay.
Ro importante suno kana sa tanan hay ro masindihan it kandila ag mapangadian ro andang mga pinalangga sa kabuhi bangud nga raya ro tyempo para dumdumon ro andang mga kaeag maskin pilang dinag-on eon sanda nga nagkaeamatay.
Pila sa mga kilaeang personalidad sa banwa it Kalibo ro nakaeobong sa nasambit nga sementeryo nga kon sa siin uwa gid ginakalipatan it andang mga himata nga bisitahan kada dag-on.
