KALIBO, Aklan — Ginkumpirma ni Aklan Governor Florencio Miraflores nga uwa eon ginpadayuna it sangka cruise ship ro andang biyahe sa isla it Boracay bangud sa paeag it 2019 novel coronavirus acute respiratory disease (nCov ARD).
Ro MV Seabourn Ovation hay nakataeana kunta nga magdungka sa isla sa kauna-unahang kahigayunan.
Sakay kara ro mga turistang Europeans ag Americans.
Dugang pa ni Miraflores nga ro mismong management it cruise ship ro nagdesisyong kanselahon ro pagdungka sa Boracay matapos nga nag-agi ro andang barko sa Hong Kong.
Raya hay bangud sa ginapatuman nga travel ban it gobyerno pasueod ag paguwa it China.
Sa pihak nga parte, fake news sigon ro nagakalhit nga may direct flights gihapon halin sa China nga nagahugpa sa Kalibo international airport.
Mabahoe sigon ro anang pagpati nga ro mga naispatang Chinese tourists nga padayonnga naga-aeabutan sa isla hay una eon nga nakasueod sa Pilipinas antes pa man ro ginpatuman nga travel ban ko Pebrero 2 ag nagdiretso sa Boracay.
