Ginpahayag ni Aklan first district board member Nemesio Neron nga para development ro ginaduso nga Maharlika Investment Fund kon sa siin pagagamiton raya sa mga proyekto it gobyernp.
Nauna eon nga ginpalig-on it Kamara sa ikatlong pagbasa ro House Bill 6608 ukon Maharlika Investment Fund antes daeayon nga matapos ro sesyon it Kongreso para sa dag-on 2022.
Ginpahayag dugang ni Neron nga may maganar sa investment kon madumaeahan raya it eksakto ag maayos.
Magiging risgo eamang raya kon uwa it kasayuran ro nagadumaea ag kon mahaluan it corruption.
Nauna eon nga ginsertipakahang urgent ni Pangueong Ferdinand Marcos Jr.ro nasambitang proposisyon.
Kapin sa 279 lawmakers ro bumoto pabor sa proposisyon samtang an-om ro uwa nagpabor kara.
Nasayuran nga tuyo it MIF Bill nga tipunon ro pondo it government financial institutions ukon GFIs agud ikapital ag makabuoe it mas mabahoe nga kita nga imaw man ro igataeana sa mga pambansang programa ag proyekto it gobyerno kaparehas sa kuryente, agrikultura ag transportasyon.
Magaserbeng paunang pondo ro P50 billion halin sa Landbank of the Philippines, P25 Billion halin sa Development Bank of the Philippines ag 100% it dibidendo it Bangko Sentral ng Pilipinas, kamana man ro napueong porsyento it gaming revenues halin sa PAGCOR ag iba pang government-owned gaming operators.
