KALIBO, Aklan—Ginatun-an eon it Sangguniang Bayan it Malay ro proposisyon nga paggamit it mas madasig ag epektibong antigen tests para sa mga turista ag mga residenteng magasueod sa isla it Boracay.
Ro antigen testing gamit ro direct nasal swab hay planong obrahon nga pre-boarding requirement sa mga turistang magasueod sa isla samtang ro onsite testing hay para sa mga boatmen, trabahador ag mga residente.
Tuyo kara nga mas pang mapabaskog ro away sa deadly virus ag malikawan ro pagkalhit kara sa Boracay matapos nga pormal raya nga ginbuksan sa publiko.
Suno kay LaBx Corporation chief operating officer Norman Bungubung sa anang pagtambong sa session it SB nga ro andang antigen test hay nagabalor it P2,300 pesos ag posibleng masayuran eagi ro resulta sa sueod it 15 minuto.
Raya man sigon ro presenteng ginagamit it House of Representatives, Philippine Basketball Association, Philippine Airlines, ag mga lokal nga gobyerno it Baguio, Bicol ag sa Northern Luzon.
