KALIBO, Aklan — An-um nga buean antes ro midterm elections sa Mayo 2025, nagpatigayon ro Commission on Elections (Comelec) it kauna-unahang national convention para sa mga election officers halin sa nagkaeain-eain nga parte it nasyon sa World Trade Center sa Pasay City ko Nobyembre 19 hasta 21.
Suno kay Atty. Christian Itulid, election officer it Comelec Kalibo nga sambilog imaw sa nagtambong sa kapin sa 4,000 nga mga delegado.
Nataw-an sigon it kahigayunan nga magkililita ro mga election officers, pati man ro provincial election supervisors ag regional election directors.
Sa nasambit nga convention hay nataw-an sigon sanda it oportunidad nga matur-an ag ma-train kon paalin nga gamiton ro bag-ong automated counting machine ag iba pang bagay nga may kaangtanan sa automated election system.
Mag-eowas kara, naging kahigayunan man ro pagtililipon agud nga kilaeahon ro mga naga-excell nga empleyado it komisyon ag pasidunggan ro mga magaretiro ag ro mga nagtaliwan eon.
Tiempo man sigon ro convention bangud nga nagapahaum eon sanda para sa maabot nga roadshow it automated counting machines umpisa sa masunod nga buean it Disyembre agud nga maging familiar kara ro publiko.
Nasayuran nga sa eleksyon sa Mayo 2025, pagagamiton sa kauna-unahang kahigayunan it Comelec ro Full Automation System with Transparency Audit/Count (FASTrAC) kaibahan ro joint venture nga ginapangunahan it Miru Systems bilang service provider.
