KALIBO, Aklan—Gina-engganyo it mga negosyante ro Boracay Inter-Agency Task Force on Emerging Infectious Diseases nga pasugtan eon ro paggamit it saliva testing sa COVID-19 agud nga makasueod ag makabakasyon sa isla it Boracay.
Sa draft resolution it Philippine Chamber of Commerce and Industry ukon PCCI-Western Visayas nga mas barato ro saliva testing kumpara sa presenteng ginagamit nga Reverse Transcription Polymerase Chain Reaction (RT-PCR) test.
Mag-eowas kara, madasig nga masayuran ro resulta it saliva test , kun sa siin sa sueod it tatlo hasta ap-at nga oras hay may resulta eon kumpara sa 24 oras nga paghueat sa swab test.
Engkaso nga aprubahan it Boracay IATF, iga-endorso man nanda raya sa national IATF.
Pagapadaehan man it kopya kara ro Department of Tourism, Department of the Interior and Local Government ag Department of Environment and Natural Resources.
Nauna kara, nagpaguwa man it resolusyon ro LGU-Malay angot sa paggamit it saliva testing it Philippine Red Cross sa pagtumod kon positibo sa Covid-19 ro mga turista ag maskin ro mga residente it banwa it malay ag isla it Boracay.
Sa makaron hay ginahueat pa it Department of Health (DOH) ro resulta sa ginapatigayo nga pagtuon it Research Institute of Tropical Medicine sa accuracy it saliva testing.
