KALIBO, Aklan–Manami nga inisyatibo suno kay market supervisor Abel Policarpio it Kalibo public market ro ginaduso makaron nga resolusyon it Philippine Chamber of Commerce and Industry ukon PCCI Aklan nga digital eon ro kilohan nga dapat gamiton it mga negosyante sa merkado publiko.
Apang, ginpaathag ni Policarpio nga dapat may ordinansa nga maipasa angot kara para may basehan nga pagasandigan sa pagpatuman sa mga vendor.
Sa pihak kara, ginakabaeak-an man nana nga maging dugang nga paeas-anon para sa mga vendor kon irequired sanda nga digital eon ro kilohan nga pagagamiton bangud nga medyo may kamahaean raya nga gamit kon ikumpara sa nakaangdan nga manual nga kilohan.
Apang, uwa sigon sanda it mahimo sa oras nga matuman raya kundi nga magsunod sa mandato.
Aminado man si Policarpio sa mga reklamo nga may dayaan nga nagakatabo sa kilohan it pilang negosyante rason nga sigidas ro andang inspection.
Ginlaygayan man kara ro mga manugbaligya nga inde magpamentaha sa mga bumaeakae bangud nga ginatubos ro andang baligya maskin nga may kamahaean ro presyo.
