Gin-aprubahan ni Pangueong Ferdinand Marcos Jr ro paggamit eon it hybrid rice bilang pinakamanami nga alternatibo sa inbred variety para tumaas ro produksyon it bugas.
Raya hay sa pakipagpueong it Pangueo sa SL Agritech Corporation ukon SLAC.
Ro SLAC hay sangka pribadong kumpanya nga nagahimu it research, development, production ag distribution it hybrid rice seeds ag premium quality rice.
Ginpahayag ni presidential communication office secretary Cheloy Garafil nga gintalakay ro mga hangkat sa industriya it bugas.
Ginsuhesiyon man it SLAC nga maga-convert it 1.90 milyong ektarya it target areas para sa certified seeds nga pagatanuman it hybrid seeds sa sueod it ap-at nga dag-on.
Suno mat-a sa Pangueo nga magapatuman imaw it sangka programa nga magatukod sa pagahimuon nga paghalin eon sa pamaagi it pagtanom it hybrid seeds sa pamaagi it pagpanupod it subsidiya ag pautang sa mga mangunguma.
Nasayuran nga sa nakataliwan nga daywang dag-on, mas mataas it 41% ro ani it mga mangunguma sa paggamit it hybrid system kumpara sa inbred conventional seeds.
Kung siin ro mga mangungumang nagagamit it hybrid seeds hay nakapag ani it maghalin pito hasta 15 metriko tonelada kada ektarya it paeayan kumpara sa average nga 3.6 metriko tonelada eamang kada ektarya sa inbred seeds.
Nagapati si Bon Liong nga kung engkaso ro hybrid technology ro pagagamiton sa bilog nga nasyon sa daywang cropping cycle kada dag-on, mas mabahoe ro pagakitaon it mga mangunguma ag maangkon ro rice sufficiency sa nasyon.
