KALIBO, Aklan—Ginrekomenda eon it Department of Environment and Natural Resources (DENR) ro pag-angkon it Integrated QR Code System agud nga makontrol ro numero it mga turistang nagabisita sa isla it Boracay.
Raya hay matapos nga mag-eampas sa carrying capacity ro mga turistang bumuhos sa isla ko Semana Santa ukon nag abot sa 21,011 ko April 14 Huwebes Santo ag 22,278 ko April 15 Biyernes Santo kumpara sa kapasidad nga masobra sa 19,000 eamang.
Gina-engganyo man it DENR ro Department of Tourism, Department of the Interior and Local Government ag mga lokal nga gobyerno it Aklan nga makaangkon it real-time monitoring system agud nga masayuran ro numero it mga turistang mataw-an it QR code sa partikular nga petsa.
Suno kay DENR Undersecretary for Policy, Planning and International Affairs, Atty. Jonas Leones, gina-rekomenda man it ahensya ro pag-usisa sa data it airline ag shipping passengers kamana man sa mga hotel accomodation agud nga malikawan ro overbooking.
Ginmanduan man ro Ecosystems Research and Development Bureau it DENR nga tun-an ro posibilidad nga dugangan ro carrying capacity sa isla.
Sa pihak kara, anuman sigon ro mabilog nga polisiya hay dapat nga nakabase gihapon sa siyensya.
