KALIBO, Aklan — Ginduea it Provincial Health Office (PHO)-Aklan ro kabaeaka it publiko kaangot sa pagsuksok it personal protective equipment ukon PPE para sa novel coronavirus.
Raya hay matapos nga nagkalhit ro litrato it mga health worker nga nakasuksok it full gear it PPE halin sa ambulansiya pasueod sa emergency room it Aklan Provincial Hospital.
Ginpaathag ni Dr. Cornelio Cuatchon, Jr. it PHO-Aklan nga nagasunod eamang sa standard operating procedure ro mga health worker nga naka-assign sa private isolation rooms kapin eon ro mga nagasikyar sa mga pasyenteng nakitaan it flu-like symptoms nga mga dumueoong nga ginadaea sa nasambitang ospital.
Uwa sigon it dapat nga ikabaeaka ro publiko bangud normal eamang ro pagsuksok it PPE agud mapangapinan ro andang kaugalingon kontra sa nakakamatay nga sakit.
Uman nga gin-insister ni Dr. Cuatchon nga nagapabiling n-CoV free ro Aklan ag bilog nga Pilipinas.
Sa makaron suno kana hay hugot gihapon ro pag-monitor it Bureau of Quarantine sa mga dumueoong pasahero sa mga paeoparan ag pantalan sa probinsya agud inde makasueod sa nasyon ro nakakamatay nga virus.
Kahapon it hapon, Enero 28 hay nakaguwa eon ro tatlong pasyenteng ginakabig nga persons under investigation (PUI) nga na-admit sa private isolation rooms it Aklan Provincial Hospital.
Insigidang nagpatigayon it paglimpyo ag fumigation sa nasambitang ward ag bilog nga ospital.
