KALIBO, AKLAN — Ginsang-ayunan it mga tag-iya it unmanned aerial vehicles (UAVs) ukon drones ro plano it Sangguniang Bayan (SB) it Malay, Aklan nga i-regulate ukon kontrolon ro paggamit kara sa isla it Boracay.
Suno kay SB member Jupiter Aelred Gallenero, paeag sigon raya sa seguridad, ikaayong eawas ag kaeowasan it publiko sa isla.
Sa makaron sigon hay nagaabo ro nagagamit it drones sa Boracay para sa aerial photography, kasae ag iba pang mga events, kamana man sa advertising ag filmmakers para sa andang commercial.
Mag-eowas kara, ginagamit man sigon ro drones it military para sa andang surveillance, reconnaissance ag intelligence gathering.
Base sa anang ginpasa nga ordinansa, kinahang-ean nga magbueo anay ro mga operators it special purpose permits halin sa LGU-Malay para sa andang drones antes raya pasugtan nga makaeopad.
Ginpahayag pa ni Gallenero nga bawae magpaeopad it drones maeapit sa Boracay airport, kada gabi-e ag kon maeain ro tyempo.
May gintaeana sigon nga nagakaigong penalidad sa sino-mang maga-eabag sa oras nga ginpatuman ro ordinansa.
