Kadungan it selebrasyon it Father’s Day, ginpakigbahin ni Alan Reloto, principal 3 it Kalibo Pilot Elementary School ro anang mga inagyan bilang tatay sa anang tatlong unga.
Suno kana, bata pa eamang ro anang mga inunga hay na-realisar eon nana nga bukon eamang it kwarta ro dapat nga i-tao it sangka tatay sa anang mga inunga kundi pati giya.
Raya sigon hay bangud nga mageuwas sa pinansyal nga aspeto, mas kinahangean it mga inunga ro tama nga giya halin sa ginikanan, eabi eon sa tatay bilang sanda ro nagatindog nga haligi it panimaeay.
Dugang pa nana, para kana ro pagiging tatay hay malisod nga hangkat kun sa siin dapat nga itaguyod ro tanan para sa ikamayad it pamilya ag tindugan raya bilang mga ama.
Di man sigon mawaea ro pagkukueang sa mga unga bangud sa hati nga oras sa trabaho ag pagiging ama, apang insigida man nana raya nga gina-bawi sa paagi nga sayod nana.
Mageuwas sa pagiging ama sa anang tatlo ka mga unga, makabig man imaw bilang ama it mga inunga sa eskwelahan.
Sa rayang pamaagi, naprotektahan man nana ro welfare it mga inunga, maestra, ag pati eon man mga ginikanan.
Pahayag dugang ni Reloto, kadungganan eon para kanda nga makit-ang makatapos it pag-eskwela ro andang mga inunga ag maging madinaeag-on sa andang paaeabuton.
