KALIBO, Aklan — Ginpaabot ni Fr. Justy More, Chancellor it Diocese of Kalibo nga naging madasig ro pagdesisyon it mga cardinals sa bilog nga kalibutan sa pagpili it bag-ong santo papa.
Sa kamatuoran suno kana pila sa mga ginbuhian nga tinaga ni Cardinal Luis Antonio Tagle kat magkita sanda sa eubong ni Pope Francis sa Vatican hay magiging madasig eamang ro conclave.
Nagminatuod sigon raya bangud nga pagkatapos it tatlong round it botohan hay naka-ilihir ro college of cardinals it bag-ong santo papa sa pagkatawo it 69-anyos nga Amerikano, nga si Robert Francis Prevost.
Raya hay sa pihak nga owa naging matunog ro anang pangaean sa mga mabaskog nga contender nga maging kabueos ni Pope Francis.
Gin butang si Pope Leo bilang ika-267 nga Papa.
Sa pihak nga parte, mabahoe sigon ro impact sa Aklan it pagka-ilihir sa bag-ong santo papa bilang sangka Augustinian bangud nga ro Diocese of Kalibo hay gintukod it mga Agustino nga missionaries kato nga tiempo.
Mabahoe man sigon ro tsansa nga uman raya nga magabisita sa Pilipinas.
Nag-apela man si Fr. More nga ieakip sa mga pangamuyo si Pope Leo bangud nga bukon sigon it maeumo ro maging santo papa ag may mabahoe raya nga responsibilidad.
Makabig sigon nga martyrdom ro maging lider it simbahang katolika kabaliskaran sa pagpati it iba nga raya hay sangka prestige.
