Kalibo Aklan ———-Medyo gin-enjoy ag ginakahidlawan gid it mga residente sa pilang parte it Canada ro silak ukon init ni “haring adlaw” rason nga owa eun napan-uhan it mga raya ro posibleng magiging epekto sa andang ikaayong eawas.
Suno kay Bombo International Correspondent Ronnie Fernandez it Toronto Ontario, Canada nga kaabuan sa mga namatay bangud sa na-eksperyensiyahan nga “heat wave” sa British Colombia, Canada hay bangud sa heat stroke .
Gulpi eamang sigon nga naga-collapse ro iba sa mga raya ag gilayon nga binawian it andang hueam nga kabuhi.
Madumduman nga kapin sa 230 ro naireport nga patay bangud sa grabe nga init nga na-eksperyensiyahan sa nasambitan nga lugar.
Samtang sa pihak nga parte, nasunog man ro St. Jean Baptiste Parish sa Alberta, Canada ag St. Kateri Tekakwitha Church sa Nova Scotia.
Suno kay Fernandez nga posible nga arson ro natabo.
Sa mga nagtaliwan nga adlaw, nagsaka sa pito pa ka mga simbahan sa Canada ro nasunog.
Samtang, nag-abot man sa 10 ro gin-vandalize.
Kaabuan sa mga apektado nga simbahan hay makit-an sa indigenous communities.
Raya hay sa tunga it panawagan nga magpangayo it pasaylo ro Simbahang Katolika para sa ginatos ka mga bangkay nga nasapwan maeapit sa mga gintukuran it residential schools nga ginadumaea it Simbahan para sa mga katutubo nga pamatan-on maghalin 1840s hasta 1990s.
