KALIBO, Aklan— Ginmanduan ni Department of Environment and Natural Resources ukon DENR Secretary Roy Cimatu ro mga natungdan nga kompaniya nga limpyuhan ro mga nagabaeanggangat nga kabli ukon spaghetti wires sa main road it isla it Boracay.
Raya hay may kaangtanan sa dere-deretso nga ginapatigayon nga rehabilitasyon sa isla.
Pila sa mga kompaniya nga naga-operate sa Boracay hay ro electric power provider, cable ag telecom companies.
Sa ginpatigayon nga pinaka-ulihing pueong it boracay inter-agency task force , ginhambae ni cimatu nga makabig nga eye sore ro spaghetti wires sa maeapad eon makaron nga karsadahon.
Nagtau man it deadline si cimatu sa nasambit nga mga kompaniya nga kakason ro spaghetti wires antes ro katung-anan it pebrero it makaron nga dag-on kamana man ro mga luma nga mga poste.
Sa oras nga mapas-eawan nga makasunod, ro nabilin nga mga kabli hay pagahimuson it task force.
Nasayuran nga mag-eowas nga malimpyo eon ro baybayon sa isla bangud sa hugut nga implementasyon it philippine clean water act , masoehay ag tayuyon man makaron ro pagbiyahe bangud sa maeapad nga mga karsadahon.
