KALIBO, Aklan—Suportado ni Sangguniang Bayan member Augosto Tolentino ro plano nga boe-on ro presenteng senior citizen purchase booklet.
Suno sa chairman it committee on senior citizens affair nga pabor imaw sa proposisyon nanday ACT-CIS Party-list Representative Erwin Tulfo ag Marikina Representative Stella Quimbo kasunod it sangkaterbang reklamo nga nabaton it Department of Social Welfare and Development (DSWD) angot sa pagbo-oe it senior citizen discount.
Dugang pa nana nga tiempo eon agud nga ikonsidera ro pag-adopt it digitized records para sa mga senior citizen.
Gin-insister ni Tolentino nga bastante eon ro ID maskin nga owa it purchase booklet.
Dugang nga gastos sigon sa parte it gobyerno ro pagpa-obra it booklet.
Sa kamatuoran suno kana hay may pilang establisimento nga owa eon kara naga-required ag naga-usoy eon lang it ID ag reseta eabi eon kon nagabakae it bueong sa mga botika.
