KALIBO, Aklan–Natumod eon ro identity it nagaka-agnas nga eawas it sangka eaeaki nga nasapwan kaina it agahon sa suba nga sakop it Sitio Ilawod, Brgy. Bakhaw Norte, Kalibo.
Suno kay Kagawad Dubell Duran nga base sa kumpirmasyon it sangka barbero natumod ro pagkakilaeanhan it biktima nga si certain Delfin, sambilog sa nagabulig sa pagparking it mga saeakyan sa bahin it Kalibo Shopping Center.
Raya hay base sa mga tattoo nga nakita sa anang eawas ag daea nga gamit.
Ginapahayag nga kapin sa tatlong adlaw eon nga owa nakauli ro biktima sa anang gina-istaran sa tabok it tulay.
Ginapatihan nga naeumos raya bangud nga owa man it nakitang anumang nina sa anang eawas.
Una eon sigon sa state of decomposition ro bangkay kat raya hay masapwan.
Si Kagawad Duran hay sambilog sa mga unang gin-impormahan angot sa nakita nga patay nga eawas kung siin insigida imaw nga nagtawag sa MDRRMO-Kalibo para ipahisayod ro hitabo.
