KALIBO, Aklan—Nagpanindugan ro pamilya ag kapulisan nga owa it foul play sa pagkamatay it 67 anyos nga eaeaki sa sueod it anang baeay sa Sitio Carabao, Brgy. Pusiw sa banwa it Numancia.
Suno kay PMSgt. Felizardo Navarra, imbestigador it Numancia Municipal Police Station nga kumbinsido sanda nga posibleng bangud sa gina angkon nga sakit nga hypertension ukon natural cause ro ginkamatay it biktima nga owa anay ginpangaeanan.
Owa man sigon raya nakitaan it anuman nga lastro sa anang eawas.
Madumduman nga nakit-an raya it anang nagabisita kunta nga unga nga una eon sa state of decomposition bandang alas-8 it agahon.
Bangud nga owa it may nagasabat sa anang pagtawag, napilitan raya nga bringkahon ro pwertahan it andang baeay ag dikara nakita nga nagahamyangon ag owa eon it kabuhi ro anang ama sa anang eugban.
Suno sa anang mga kaeapitbaeay nga ko lunes pa it agahon ulihi raya nga nakita nga buhi.
Ginasugid nga naga-isaeahanon eon lang raya nga naga-istar sa anang baeay matapos nga mamatay ro anang misis samtang ro andang naga-isaeahanon nga unga nga sangka tricycle driver hay iya naga istar sa banwa it Kalibo.
Nagpamalibad eon man ro pamilya nga ipaidaeum sa post mortem examination ro bangkay agud kunta nga matumod ro naging rason it anang kamatayon.
