Kalibo Aklan ——-Nagapati ro pamunuan it sangka pribadong eskwelahan nga owa it foul play sa pagkamatay it andang stay-in janitor nga nasapwan nga patay ag una eon sa state of decomposition sa sueod it anang kwarto kaina it agahon sa banwa it Kalibo.
Nakilaea ro biktima nga si Philipe Zemolaba, 37 anyos, owa it asawa ag residente it Brgy. Agbago, Ibajay.
Suno kay Mrs. Nenita Bicera, principal it St. Dominic School of Kalibo nga ko Biyernes nga adlaw ulihi nana nga nakita nga buhi ro biktima.
Suno kana nga nangawa ro sambilog sa anang manugturo bangud nga naka-lock pa ro gate ag bukas ro mga iwag.
Bangud kara, naghueam sigon sanda it duplicate nga yabe agud nga makasueod sa eskwelahan.
Apang pagsaka nanda sa third floor hay nakahugum sanda it masangsang nga hugum hasta nga nadiskubre ro biktima nga owa eon it kabuhi nga nakakaya sa anang eugban.
Ginapatihan nga tatlong adlaw eon raya nga patay antes nga nasapwan nga patay eon.
Owa nakitaan it anuman nga nina sa anang eawas ro biktima ag ginapatihan nga inatake raya it anang sakit nga hypertension.
Ginasugid nga haeos napueong dag-on eon raya nga nagatrabaho sa nasambit nga eskwelahan bilang stay-in janitor.
