KALIBO, Aklan—Padayun pa ro imbestigasyon it mga otoridad sa pagkamatay it sangka 37 anyos nga welder nga nasapwan nga owa eon it kabuhi it anang mga katrababo sa sueod it under-construction nga establisyimento sa Brgy. Pook, Kalibo.
Nakilaea ro biktima nga si Elgen Aguirre, residente it Dinginan, Roxas City ag nagatrabaho sa gina-obra nga emission testing center sa nasambit nga lugar.
Base sa report, ginhana nga pukawon ro biktima it gwardiya ag anang kaibahan agud nga mag-kape, apang owa raya nagsabat rason nga andang gin-agtunan.
Dikara nataeupangdan nga maeamig ag matig-a eon ro anang eawas.
Ginpahayag dugang nga ko Agosto 15 hay nag-uli raya sa Roxas City ag nagbalik ko Agosto 17, 2020.
Ginasugid nga gin-eagnat ag ginkunyag ro eaeaki ko domingo nga adlaw.
Bangud kara, ginbawaean anay sigon ni Pook Barangay Captain Ronald Marte ro mga rumesponding katapo it MDRRMO-Kalibo kamana man ro mga kapulisan nga magpaeapit sa bangkay bilang precautionary measure.
Apang sa pag-check it taga-Municipal Health Office eabi eon ro in-charge sa covid cases hay ginduea nana ro posibilidad nga may coronavirus disease ukon covid 19 ro biktima bangud nga owa man raya nakaexperiensiya it grabeng ubo.
Agud nga makasigurado, igasuhestiyon sigon nana sa nagapanag-iya it gina-construct nga building nga boe-an it swab specimen sample ro bangkay kamana man ro anang mga nakaibahan.
Ginmanduan man nana nga magpatigayon anay it daywang domingo nga self isolation ro mga tawo sa sueod it construction site.
Ginpahayag pa ni kapitan marte nga igapaidaeum man sa autopsy ro bangkay agud nga matumod ro kabangdanan it anang pagkamatay.
Aminado man ro opisyal nga naalarma sanda sa natabu bangud ro biktima hay taga-Capiz ag sa makaron hay padayun ro pagtinaas it kaso it covid 19 sa nasambit nga probinsiya, kun sa siin maskin ro andang gobernador hay nakaangkon it infection it sakit.
