KALIBO, Aklan—Ginkumpirma it Municipal Health Office (MHO) New Washington nga may sangka senior citizen nga nabakunahan it AstraZeneca vaccine ro namatay apang indi pa sigon matumod kun may kaangtanan raya sa COVID-19 ukon bakuna.
Suno kay Dr. Daystar Sedillo it MHO-New Washington nga ginakabig nga isolated case ro insidente ag padayun pa rayang gina-imbestigahan.
Suno kana, kapin sa 11 ka mga indibidwal ro nabakunahan it sangka vial it AstraZeneca nga ginturok sa nasambit nga pasyente kun sa siin owa man sigon it naireport nga kaparehong insidente.
Ginapahayag nga ro pasyente hay may mentally challenge kamana man nga may nakita ro barangay nga mga nina sa siki it biktima.
Nasayuran nga nabaton it pasyente ro anang 1st dose it AstraZeneca vaccine ko Mayo 19, 2021
Ginpanindugan man ni Dr. Sedillo nga nag-agi sa tamang proseso ag screening ro mga bakuna.
Sa kamatuoran suno kana hay masobra sang libo eon ro nabakunahan sa New Washington.
Dugang pa kara nga nag-agi sanda sa tamang protocol sa pagpatigayun it vaccination rollout.
Ginpasiguro man ni Dr. Sedillo nga paga-imbestigahan nanda it mayad ro insidente agud malikawan ro pagpanic ag pagkabaeaka it publiko angot sa mga bakuna.
Magapatigayun man sigon sanda it meeting sa barangay agud mataw-an it nagakaigo nga impormasyon ro mga pumueoyo kamana man nga masabat ro andang mga pangutana.
Sa pihak nga parte, ginkalipay man ni Dr. Sedillo ro manami nga turnout it andang vaccination drive.
Raya hay matapos nanda nga maiturok ro kapin sa 195 doses it bakuna para sa A2 category sa daywang vaccination site partikular sa Brgy. Jalas ag Ochando, New Washington.
Nagaeaum man imaw nga mataasan pa ro alokasyon it mga bakuna agud mas maabo pa ro maabot kara.
Sa makaron hay nagaheuat eon lang sanda it go signal halin sa Provincial Health Office kun hin-uno maumpisahan ro pagbakuna sa A3 category.
Ro New Washington hay nakalista it kabilugang 88 nga kaso it COVID-19 kun siin 22 pa ro nabilin nga aktibong kaso.
